បាងកក៖ មេដឹកនាំក្រមបាតុករថៃចំនួន ១២នាក់ ត្រូវបានប៉ូលីសកោះហៅពាក់ព័ន្ឋនឹងពីបទបរិហារកេរ្តិ៍ព្រះមហាក្សត ខណៈបាតុករនៅតែបន្តគំរាមធ្វើបាតុកម្មដ៏ធំមួយទៀត។ នេះបើតាមការចេញផ្សាយដោយសារព័ត៌មាន CNA នារសៀលថ្ងៃទី២៥ ខែវិច្ឆិកា ឆ្នាំ២០២០ នេះ។
ការកោះហៅមេដឹកនាំក្រុមបាតុករទាំង១២នាក់ ខាងលើ ធ្វើឡើងបន្ទាប់ពីលោកនាយករដ្ឋមន្ត្រីថៃ ប្រាយុធ ចាន់អូចា បានបើកភ្លើងខៀវដល់អាជ្ញាធរ អនុវត្តបទបញ្ជានៃការប្រើប្រាស់ច្បាប់ប្រមាថព្រះមហាក្សត្រ គំរាមទៅកាន់ក្រុមបាតុករ ដែលអាចប្រឈមនឹងការផ្ទន្ទាទោសជាប់ពន្ឋនាគារ រយៈពេល១៥ឆ្នាំ។
ភាពតានតឹងក្នុងរដ្ឋធានីបាងកកប្រទេសថៃ កំពុងកើនឡើងកាន់តែខ្លាំងឡើងៗ ខណៈមនុស្សចំនួន៥៥នាក់ហើយ បានរងរបួសក្នុងហេតុការណ៍ប៉ះទង្គិចគ្នាជាមួយប៉ូលីស ដោយការប្រើប្រាស់កាំភ្លើងបាញ់ទឹក និងឧស្ម័នបង្ហូរទឹកភ្នែក។
គិតមកទល់ពេលនេះគឺមានរយៈពេល៤ខែ ហើយ ដែលការប្រឆាំតវ៉ានៅតែមានបន្ដឥតឈប់ឈរ។ ការតវ៉ាបានបង្ហាញសញ្ញាម្រាមដៃបីរបស់ពួកគេ ដើម្បីទាមទារចំណុចសំខាន់ៗចំនួន ០៣ គឺទាមទាមរឱ្យលោក ប្រាយុទ្ធ ចាញ់អូចា ចុះចេញពីតំណែងនាយករដ្ឋមន្ត្រី, ទី២ កែប្រែរដ្ឋធម្មនុញ្ញ ឲ្យដូចមុនឆ្នាំ២០១៩ និងទី៣ ធ្វើកំណែទម្រង់រាជានិយម ដែលផ្តល់អំណាចជ្រុលពេក ដល់ព្រះមហាក្សត្របច្ចុប្បន្ន៕
អត្ថបទ៖ ហ្សា