ក្រសួងវប្បធម៌អ៊ីតាលី បានថ្លែងកាលពីថ្ងៃសៅរ៍ថា អ្នកបុរាណវិទ្យាបានរកឃើញគ្រោងឆ្អឹងរបស់បុរសពីរនាក់ ដែលស្លាប់ដោយសារការផ្ទុះភ្នំភ្លើងក្នុងឆ្នាំ ៧៩ នៃគ.ស ដែលបានបំផ្លាញទីក្រុងបុរាណ Pompeii របស់ចក្រភពរ៉ូម៉ាំង។
ក្នុងចំណោមនោះ បុរសម្នាក់ប្រហែលជាមានឋានៈខ្ពស់ និងមានអាយុចន្លោះពី ៣០ ទៅ ៤០ឆ្នាំ ដែលមានអាវធំនៅជាប់ក្រោមករបស់គាត់នៅឡើយ។ ចំណែកបុរសម្នាក់ទៀត ប្រហែលជាមានអាយុចន្លោះពី ១៨ ទៅ ២៣ឆ្នាំ ស្លៀកពាក់ខោអាវ ហើយមានឆ្អឹងខ្នងខ្ទេចខ្ទីជាច្រើនកន្លែងដែលបង្ហាញថា គាត់ធ្លាប់ជាទាសករដែលធ្វើការធ្ងន់។
គ្រោងឆ្អឹងទាំងពីរនេះ ត្រូវបានគេរកឃើញនៅ Civita Giuliana ដែលមានចម្ងាយប្រមាណ ៧០០ម៉ែត្រភាគពាយព្យនៃមជ្ឈមណ្ឌលបុរាណ Pompeii ក្នុងបន្ទប់ក្រោមដីនៅតំបន់វីឡាដ៏ធំមួយដែលកំពុងត្រូវបានគេជីករុករក។
លោក Massimo Osanna ប្រធានផ្នែកបុរាណវិទ្យាបាននិយាយថា៖ «ជនរងគ្រោះទាំងពីរនាក់នេះ ប្រហែលជាកំពុងរត់រកកន្លែងជ្រក ហើយត្រូវបានហូរអូសដោយកម្ទេចកម្ទីភ្នំភ្លើងនៅម៉ោងប្រហែល ៩ព្រឹក»។
នៅក្នុងសេចក្តីថ្លែងការណ៍មួយ រដ្ឋមន្ត្រីក្រសួងវប្បធម៌លោក Dario Franceschini បាននិយាយថា ការរកឃើញនេះបានគូសបញ្ជាក់ពីស្ថានភាពរបស់ក្រុង Pompeii ថាជា «កន្លែងដែលមិនគួរឱ្យជឿសម្រាប់ការសិក្សា និងការស្រាវជ្រាវ»។
ក្រុង Pompeii មានចម្ងាយ ២៣គីឡូម៉ែត្រភាគអាគ្នេយ៍នៃទីក្រុង Naples ដែលជាជម្រកដល់ប្រជាជនប្រមាណ ១៣ ០០០នាក់ នៅពេលដែលវាត្រូវបានកប់ដោយផេះ ធូលី និងកម្ទេចកម្ទីភ្នំភ្លើងដែលផ្ទុះនាពេលនោះ។ មុនសតវត្សរ៍ទី១៦ គ្រោងឆ្អឹងទាំងនោះមិនត្រូវបានគេរកឃើញទេ ហើយការជីករុករកទើបតែបានរៀបចំឡើងនៅប្រហែលឆ្នាំ១៧៥០ប៉ុណ្ណោះ៕