ខេត្តប៉ៃលិន៖ បន្ទាប់ពីលេចឮដំណឹងថា មានសត្វគោជាច្រើនក្បាលទទួលរងការឆ្លងរោគរាតត្បាតទូទាំងខេត្តប៉ៃលិន ឥឡូវពលរដ្ឋអ្នកចិញ្ចឹមសត្វជ្រូកជាលក្ខណគ្រួសារក៍កំពុងព្រួយបារម្ភខណជ្រូកដែលពួកគាត់ចិញ្ចឹមឆ្លងជម្ងឺបណ្តាលឲ្យឈឺងាប់ជាបន្តបន្ទាប់។
កសិករម្នាក់ ឈ្មោះ ជុំ ទិត្យ ភេទប្រុស អាយុ៣៥ឆ្នាំ ប្រពន្ធ ឈ្មោះ កែវ ស្រី អាយុ៣០ឆ្នាំ បានចិញ្ចឹមជ្រូកជាង៣០ក្បាល ងាប់អស់ជាង១០ក្បាល និង ឈ្មោះ ជុំ គា ភេទប្រុស អាយុ៣២ឆ្នាំ ក៏ចិញ្ចឹមជ្រូកជាង៣០ក្បាលដែរ ងាប់អស់២ទៅ៣ក្បាល រស់នៅភូមិសួនអំពៅកើត សង្កាត់ប៉ៃលិន ក្រុងប៉ៃលិន ខេត្តប៉ៃលិន បានឱ្យដឹងដូចៗគ្នាថា កាលពីប៉ុន្មានខែកន្លងទៅនេះ ជ្រូករបស់ពួកគាត់ កើតជម្ងឺរមាស់ពេញខ្លួន បែកពពុះមាត់ អត់ស៊ីបាយ បណ្តាលឱ្យស្គមស្គាំងស្លាប់ជាបណ្តើរៗ ធ្វើឱ្យមានការព្រួយបារម្ភតែម្តង ។
ប្រភពបន្តទៀតថា ទោះបីជាហៅពេទ្យសត្វឯកជន ទៅចាក់ថ្នាំព្យាបាលយ៉ាងណា ក៏មិនអាចជាសះស្បើយនោះឡើយ ដោយចាក់ម្តងៗ ចំណាយអស់ថវិកាជាច្រើន ។ លុះក្រោយមក ពួកគាត់ក៏ទិញថ្នាំពេទ្យ យកទៅចាក់ព្យាបាលខ្លួនឯង ប៉ុន្តែជ្រូកខ្លះក៏ជាសះស្បើយឡើងវិញ ជ្រូកខ្លះក៏អត់ជា បណ្តាលឱ្យងាប់តែម្តង ព្រោះគ្មានជំនាញច្បាស់លាស់ ទើបនឹកឃើញឱ្យខាងព័ត៌មានជួយចុះផ្សាយ ដើម្បីឮដំណឹងដល់ពេទ្យសត្វចុះទៅជួយសង្គ្រោះទាន់ ពេលវេលា ។
លោកបន្ថែមថា ក្រោយមកក៏នឹងកឃើញទាក់ទងទៅខាងសារព័ត៌មានឱ្យជួយចុះផ្សាយ ដើម្បីឮដំណឹងដល់ខាងពេទ្យសត្វ ចុះទៅព្យាបាលសត្វជ្រូកចិញ្ចឹមរបស់ខ្លួន ដែលកំពុងតែមានបញ្ហាកើតជម្ងឺនេះផងដែរ ដោយនៅល្ងាចថ្ងៃទី២០ ខែវិច្ឆិកា ឆ្នាំ២០២០នេះ ខាងពេទ្យសត្វនឹងចុះទៅដល់កន្លែងរបស់ខ្លួន ដើម្បីព្យាបាលជ្រូកតែម្តង។
ពាក់ព័ន្ធបញ្ហានេះលោក ខៀវ សុថុន ប្រធានការិយាល័យផលិតកម្ម និងបសុសត្វខេត្តប៉ៃលិន បានឱ្យដឹងថា ដោយ សារតែកាលពីថ្មីៗ កន្លងទៅនេះ មានភ្លៀងធ្លាក់ជោកជាំខ្លាំងពេក បណ្តាលឱ្យសត្វគោទទួលរងការកើតជម្ងឺ ទើបខាងលោកដឹកនាំមន្ត្រីក្រោមឱវាទ ចុះព្យាបាលទាន់ពេលវេលា ហើយសត្វគោនៅតាមភូមិ ក៏ជិតជាសះស្បើយអស់ដែរ ដោយខាងលោក ក៏បានពន្យល់ណែនាំពីរបៀបការពារកុំឱ្យសត្វឆ្លងជម្ងឺពីមួយទៅមួយ និងពន្យល់ពីរបៀបថែទាំសុខភាពសត្វទាំងអស់ផងដែរ ។
លោកប្រធានការិយាល័យបាន បញ្ជាក់ឱ្យដឹងទៀតថា បន្ទាប់ពីទទួលបានព័ត៌មានកាលពីវេលាម៉ោង៩ និង៣០នាទីព្រឹកថ្ងៃទី២០ ខែវិច្ឆិកា ឆ្នាំ២០២០ នេះទៀតថា មានសត្វជ្រូកចិញ្ចឹមជាច្រើនក្បាលនៅក្នុងភូមិសួនអំពៅកើត សង្កាត់ប៉ៃលិន ក្រុងប៉ៃលិន ខេត្តប៉ៃលិន ទទួលរងការឈឺ និងងាប់ មួយចំនួនខាងលោកនឹងបន្តចុះចាក់ថ្នាំព្យាបាលនៅពេលឆាប់ៗ ខាងមុខនេះ ។ លោកបញ្ជាក់ថា ចំណែកឯសត្វគោចិញ្ចឹមរបស់ប្រជាពលរដ្ឋតាមភូមិ ខាងលោកនឹងចុះចាក់វ៉ាក់សាំងការពារជម្ងឺនៅពេលក្រោយ ដើម្បីកុំឱ្យឈឺឆ្លងពីមួយក្បាលទៅមួយក្បាល ដែលជាហេតុធ្វើឱ្យមានការលំបាកក្នុងការទប់ស្កាត់ផងដែរ៕