ខេត្តឧត្តរមានជ័យ៖ ក្រុមការងារទទួលបន្ទុកកម្មវិធីផ្សព្វផ្សាយបច្ចេកទេសកសិកម្មថ្មី ដែលធន់ទៅនឹងការប្រែប្រួលអាកាសធាតុ (ASPIRE) ថ្នាក់ខេត្ត ស្រុក ឃុំ និងទីប្រឹក្សាបច្ចេកទេស បានចូលរួមក្នុងពិធីចែកកូនត្រីអណ្តែងដល់សមាជិកបណ្តុំអាជីវកម្មត្រីនៅភូមិពង្រ ឃុំចុងកាល់ ស្រុកចុងកាល់ខេត្តឧត្តរមានជ័យ កាលពីថ្ងៃទី១កើត ខែមិរសិគ ឆ្នាំជូត ទោស័កពស២៥៦៤ត្រូវនឹងថ្ងៃទី១៦ ខែវិច្ឆិកា ឆ្នាំ២០២០។
ពិធីចែកកូនត្រីអណ្តែងនេះគឺបានរៀបចំឡើងក្រោមអធិបតីភាព លោក សូត្រ ស៊ីសុខឃាង ប្រធានមន្ទីរកសិកម្មរុក្ខាប្រមាញ់ និងនេសាទខេត្តឧត្តរមានជ័យ និងជាប្រធានអនុកម្មវិធីអាស្ប៉ាយប្រចាំខេត្ត និងមានការការចូលរួមផងដែរពីសមាជិកបណ្តុំអាជីវកម្ម ដោយសរុបចំនួន ៤៨នាក់ ក្នុងនោះមានស្ត្រីចំនួន ១៥នាក់។
ថ្លែងក្នុងពិធីនេះលោកប្រធានមន្ទីរបានបញ្ជាក់ថា កម្មវិធីចែកកូនត្រីទៅដល់សមាជិកបណ្តុំអាជីវកម្មត្រីដែលទទួលបានការគាំទ្រពីកម្មវិធីអាស្ប៉ាយនេះគឺធ្វើឡើងក្នុងគោលបំណងដើម្បីរួមចំណែកក្នុងការជម្រុញលើកទឹកចិត្តបន្ថែមទៀតដល់ប្រជាកសិករក្នុងកំឡុងពេលដែលប្រទេសទើបប្រទះទៅនឹងបញ្ហាគ្រោះធម្មជាតិទឹកជំនន់និងពិសេសគឺការរំខានដោយជំងឺCovid 19នោះ ហើយបន្ថែមលើនេះទៅទៀតការចែកជូនកូនត្រីនេះក៏អាចជួយសម្រួលបន្ទុកដល់កសិករក្នុងការចំណាយនិងឈានដល់ការលើកកម្ពស់ជីវភាពរស់នៅរបស់ប្រជាកសិករនៅពេលបានប្រមូលផលពីការលក់ចេញនូវផលត្រីទាំងនេះ៕
