ខេត្តបាត់ដំបង៖ នៅថ្ងៃច័ន្ទ ១កើត មិគសិរ ឆ្នាំជូតទោស័ក ពស ២៥៦៤ ត្រូវនឹងថ្ងៃ១៦ ខែវិច្ឆិកា ឆ្នាំ២០២០ លោក អ៊ិន សុវណ្ណមុន្នី អនុប្រធានមន្ទីរកសិកម្ម រុក្ខាប្រមាញ់ និងនេសាទខេត្ត និងជាអនុប្រធានគ្រប់គ្រងអនុកម្មវិធី ASPIRE លោក ខាត់ បូរិន ប្រធានការិយាល័យក្សេត្រសាស្ត្រ និងផលិតភាពកសិកម្ម លោករុំ រ៉ា ទីប្រឹក្សារគ្រប់គ្រងអនុកម្មវិធីASPIRE បានចុះមូលដ្ឋានដើម្បីស្វែងយល់ពីស្ថានភាពផលិតកម្មនៃបណ្តុំអាជីវកម្មបន្លែ ព្រមទាំងបានចុះពិនិត្យមើលការដាំដុះបន្លែនៅផ្ទះសំណាញ់ និងក្រៅផ្ទះសំណាញ់ ក្រោយពេលទឹកជំនន់មានការលិចលង់ទាំងស្រុងរបស់កសិករដែលទទួលបានការគាំទ្រពីកម្មវិធីអាស្ប៉ាយ។
ពេលនេះក្រុមការងារបានពិនិត្យឃើញថា កសិករជាសមាជិកបណ្តុំបន្លែ លោកស្រីអឿន ដានី ដែលដាំដុះ ផ្កាខាត់ណាព័ណ៌លឿង នៅភូមិអន្លង់តាម៉ី ឃុំឈើទាល ស្រុកបាណន់ ខេត្តបាត់ដំបងគឺទទួលបានផលយ៉ាងល្អគួរជាទីមោទន។
ក្រុមការងារនៃកម្មវិធីASPIRE ក៏បានសាកសួរពីស្ថានភាពលើផលិតកម្មបន្លែហើយសមាជិកនៃបណ្តុំក៏បានបញ្ជាក់ថា បច្ចុប្បន្ននេះបណ្តុំអាជីវកម្មបានផលិតបន្លែ ដែលអាចផ្គត់ផ្គង់ទៅទីផ្សារដោយមានឈ្មួញកណ្តាលតែងតែប្រមូលទិញបន្លែពីក្នុងភូមិជាប្រចាំ និងសមាជិកខ្លះបានត្រៀមខ្លួនរួចជាស្រេចសម្រាប់ស្តាឡើងវិញ នៃការដាំដុះបន្លែសម្រាប់ផ្គត់ផ្គង់ទីផ្សារកាន់តែច្រើនថែមទៀតផងដែរ។
