អាមេរិក៖ ក្រសួងការបរទេសសហរដ្ឋអាមេរិក ដែលកំពុងស្ថិតនៅក្រោមអំណាចរបស់លោក ដូណាល់ ត្រាំ បានព្យាយាមរារាំងមិនឱ្យលោក Joe Biden ប្រធានាធិបតីជាប់ឆ្នោតថ្មី ចូលមើលសារមួយចំនួនដែលទទួលបានពីមេដឹកនាំបរទេសនានា ស្របពេលដែលលោក ដូណាល់ ត្រាំ នៅបន្តបដិសេធមិនទទួលស្គាល់ជ័យជំនះរបស់លោក ចូ បៃដិន។
យោងតាមមន្ត្រីក្រសួងការបរទេសអាមេរិក បានឱ្យដឹងថា ជាទម្លាប់ ក្រសួងការបរទេសតែងគាំទ្ររាល់ការប្រាស្រ័យទាក់ទងសម្រាប់ប្រធានាធិបតីជាប់ឆ្នោតថ្មីផងដែរ ដែលជាមូលហេតុមេដឹកនាំបរទេសជាច្រើន ផ្ញើសារតាមរយៈក្រសួងនេះ។ ប៉ុន្តែ លោក Joe Biden បែរជាត្រូវបានហាមឃាត់មិនឱ្យចូលប្រើប្រាស់ធនធានរបស់ក្រសួងការបរទេសនៃរដ្ឋបាលលោក ដូណាល់ ត្រាំ ទៅវិញ។
ប្រភពព័ត៌មានមួយចំនួនបានលើកឡើងថា ក្រុមការងាររបស់លោក ចូ បៃដិន មានការទាក់ទងជាមួយរដ្ឋាភិបាលបរទេស ដោយគ្មានការចូលរួមពីក្រសួងការបរទេសអាមេរិក ក្នុងនោះរួមមាន៖ លោកស្រី Angela Merkel អធិការបតីអាឡឺម៉ង់ និងនាយករដ្ឋមន្ត្រីកាណាដា លោក Justin Trudeau ជាដើម។ ក្រុមលោក ចូ បៃដិន ក៏បានទាក់ទងនាយករដ្ឋមន្ត្រីជប៉ុន ដើម្បីគ្រោងបើកការសន្ទនារតាមទូរស័ព្ទផងដែរ៕