សារព័ត៌មាន The Nation Thailand បានចុះផ្សាយថា រដ្ឋាភិបាលថៃ បានជំរុញឱ្យមានហាមឃាត់កម្មវិធីទំនាក់ទំនង Telegram ក្រោមហេតុបង្កការគំរាមកំហែងដល់សន្តិសុខជាតិ នៅក្រោមក្រឹត្យបន្ទាន់មួយ ដែលប្រទេសថៃទើបតែដាក់ចេញនាពេលថ្មីៗនេះ។
ក្រសួងសេដ្ឋកិច្ចឌីជីថលនិងសង្គម (DES) បានស្នើឱ្យគណៈកម្មាធិការជាតិផ្សព្វផ្សាយ និងទូរគមនាគមន៍ (NBTC) លុបព័ត៌មាននៅលើកម្មវិធី Telegram ដោយអះអាងថា វាបានរំលោភលើក្រឹត្យបន្ទាន់ដែលបានដាក់កាលពីថ្ងៃព្រហស្បតិ៍ ដើម្បីឆ្លើយតបនឹងការកើនឡើងនៃបាតុកម្មប្រឆាំងរដ្ឋាភិបាល។
សូមជម្រាបថា បន្ទាប់ពីរដ្ឋាភិបាលថៃ បានបង្ក្រាប Facebook របស់ក្រុមចលនា Free Youth ក្រោយមកពួកគេ និងក្រុមបាតុករ ក៏បានប្ដូរទៅប្រើបណ្ដាញ Telegram សម្រាប់ការទាក់ទងនិងផ្ដល់ព័ត៌មានគ្នា ដែលជាហេតុអាជ្ញាធរថៃចង់ហាមឃាត់ ឬរឹតត្បឹតលើបណ្ដាញទំនាក់ទំនងសង្គមមួយនេះ៕