ទីក្រុងញូវដេលី ប្រទេសឥណ្ឌា កំពុងរងការគំរាមកំហែងដោយការបំពុលអាកាស ក្រោយពីមានការដុតគល់ដំណាំដែលប្រមូលផលរួច បង្កទៅជាអណ្តាតភ្លើងឆាបឆេះ ចេញពីតំបន់ភាគខាងជើងប្រទេសមួយនេះ។ នេះបើតាមការចុះផ្សាយដោយសារព័ត៌មានCNN នាថ្ងៃទី២១ ខែតុលា ឆ្នាំ២០២០ នេះ។
អាជ្ញាធរក្រុងញូវដេលី បានលើកឡើងថា ក្រៅពីការដុតគល់ដំណាំរបស់ប្រជាពលរដ្ឋ ការដុតសំរាម ក៏ជាផ្នែកមួយជំរុញដល់ការបំពុលអាកាស ផងដែរ ខណៈសកម្មភាពទាំងនោះ តែងកើតមានជារៀងរាល់ឆ្នាំ នៅប្រទេសឥណ្ឌា ក្នុងរដូវរងារនេះ។ ការបំពុលអាកាសនេះ នឹងនាំផលវាអាក្រក់ដល់បរិស្ថាន ពិសេសរដ្ឋធានីញូវដែលី តែម្តង ដោយសារផ្សែងអ័ព្ទក្មួលខ្មាញ់ពេញអាកាស គួបផ្សំនឹងការបំភាយឧស្ម័នពីរោងចក្រ ជាដើម។
មន្ត្រីបរិស្ថានឥណ្ឌា កំពុងបង្ហាញក្តីបារម្ភពីការបំពុលនេះដែលអាចបង្កការគំរាមកំហែងទ្វេរដង ធ្វើឱ្យប្រជាជនមានហានិភ័យខ្ពស់នៃការឆ្លងមេរោគធ្ងន់ធ្ងរ ស្របពេលដែលប្រទេសឥណ្ឌា មិនទាន់ស្រាក់ស្រាលពីជំងឺរាតត្បាតកូវីដ១៩ នៅឡើយទេ៕ ហ្សា
