អ្នកជំនាញជឿជាក់ថា បញ្ហាទឹកជំនន់នៅតំបន់កណ្តាលប្រទសវៀតណាមគឺជាលទ្ធផលនៃគំរូអាកាសធាតុដ៏អាក្រក់ថ្មីមួយ នាពេលអនាគត។
«យោងតាមការវាយតម្លៃពីស្ថានភាពឧតុនិយមបច្ចុប្បន្ន កម្រិតពិភពលោក វៀតណាមកំពុងតែរងគ្រោះអាកាសធាតុដ៏អាក្រក់ជាងគេ ក្នុងពេលបច្ចុប្បន្ន» នេះបើតាមលោក Grahame Madge អ្នកនាំពាក្យការិយាល័យឧុនិយមនៅអង់គ្លេស U.K. Met Office ដែលជាស្ថាប័នផ្តល់ព័ត៌មានពីហានិភ័យអាកាសធាតុ និងវិទ្យាសាស្ត្រអាកាសធាតុលើសកលលោក។
ចាប់តាំងពីថ្ងៃទី៦ តុលា មក តំបន់កណ្តាលប្រទេសវៀតណាមបានរងគ្រោះពីការធ្លាក់ភ្លៀងយ៉ាងខ្លាំង ដែលនាំឲ្យមានទឹកជំនន់ធ្ងន់ធ្ងរ។ ព្យុះ Linfa ដែលវាយប្រហារកាលពីថ្ងៃទី១១ តុលា និងព្យុះ Nangka វាយប្រហារនៅថ្ងៃបន្ទាប់ បានបង្កជាការបាក់ដី ក្នុងតំបន់ជាច្រើន នៅប្រទេសវៀតណាម។
គួរបញ្ជាក់ថា មនុស្សយ៉ាងតិច១០២នាក់ហើយដែលបានស្លាប់ ព្រោះបញ្ហានេះ ខណៈដែលមនុស្ស២៦នាក់បាត់ខ្លួន នៅតំបន់កណ្តាលប្រទេសវៀតណាម។ ផ្ទះប្រជាពលរដ្ឋ១៦៦៧៨០កន្លែងត្រូវបានជន់លិច ហើយមនុស្សជិត១០ម៉ឺនាក់ត្រូវបានជម្លៀសទៅរកទីទួលសុវត្ថិភាព៕
