បាតុកររាប់ពាន់នាក់បានប្រមូលផ្តុំគ្នានៅទីតាំងជាច្រើនក្នុងទីក្រុងបាងកក នៅល្ងាចថ្ងៃសៅរ៍ ដើម្បីបញ្ចប់នូវរដ្ឋាភិបាលរបស់លោកនាយករដ្ឋមន្ត្រី ប្រាយុទ្ធ ចាន់អូចា ទោះបីជាមានការប៉ះទង្គិចគ្នានៅយប់ថ្ងៃសុក្រដែលប៉ូលីសប្រើកាណុងបាញ់ទឹកដើម្បីបំបែកហ្វូងបាតុករក៏ដោយ។ នេះបើយោងតាមការចុះផ្សាយរបស់ CNA នៅថ្ងៃទី១៧ ខែតុលា ឆ្នាំ២០២០។
ខណៈរដ្ឋាភិបាលថៃ បានប្រកាសអាសន្នហាមឃាត់មិនឱ្យមានការប្រមូលផ្តុំក្តី នៅល្ងាចនេះគេនៅតែឃើញក្រុមបាតុករ ឈរតវ៉ា ដែលជាថ្ងៃទី៤នៃការធ្វើបាតុកម្ម។ ពួកគេបានបង្ហាញវត្តមាននៅគ្រប់ស្ថានីយ៍រថភ្លើង BTS នៅម៉ោង ៣ រសៀលហើយពិចារណារកកន្លែងបាតុកម្មជាបន្ត។
សូមរំលឹកថាទីក្រុងបាងកកបានស្ថិតនៅក្នុងស្ថានភាពប្រកាសអាសន្នចាប់តាំងពីម៉ោង ៤ ព្រឹកថ្ងៃព្រហស្បតិ៍ដោយហាមឃាត់ការប្រមូលផ្តុំមនុស្ស ៥ នាក់ឬច្រើនជាងនេះក៏ដូចជាសកម្មភាពណាមួយដែលនឹងបង្កឱ្យមានចលាចល៕