ប្រធានផ្នែកសង្គ្រោះបន្ទាន់ នៃអង្គការសុខភាពពិភពលោក (WHO) បានឲ្យដឹងថ្មីៗនេះថា តាមការប៉ាន់ស្មានដោយក្រុមជំនាញ មនុស្សម្នាក់ក្នុងចំណោម ១០នាក់ ឬ ១០% នៃចំនួនប្រជាជន នៅទូទាំងពិភពលោក ៧.៨ពាន់លាននាក់ អាចនឹងឆ្លងជំងឺ COVID-19 ដូច្នេះ មនុស្សប្រមាណ៧៨លាននាក់ អាចនឹងត្រូវឆ្លងវីរុសកូវីដ១៩នេះ។
នៅក្នុងសម័យប្រជុំនៃក្រុមប្រឹក្សាអង្គការ WHO កាលពីថ្ងៃទី៥ តុលា ម្សិលមិញ វេជ្ជបណ្ឌិតលោក Michael Ryan បញ្ជាក់ឲ្យដឹងថា តួលេខនៃចំនួនអ្នកឆ្លងរវាងទីក្រុង និងតំបន់ជនបទមានភាពខុសគ្នា។ ទោះយ៉ាងណា អត្រាឆ្លងខ្ពស់បានចង្អុលបង្ហាញថា ប្រជាជនភាគច្រើននៅជុំវិញពិភពលោក នៅតែប្រឈមនឹងហានិភ័យខ្ពស់ដដែល។ លោក Ryan ក៏បានកត់សម្គាល់ផងដែរថា ករណីឆ្លងនៅក្នុងតំបន់អាស៊ីអាគ្នេយ៍ អឺរ៉ុប និងមេឌីទែរ៉ាណេភាគខាងកើតកំពុងតែបន្តកើនឡើង ខណៈដែលស្ថានភាពនៅទ្វីបអាហ្វ្រិក និងតំបន់ប៉ាស៊ីហ្វិកខាងលិចមានសភាពល្អប្រសើរជាង តែទោះជាយ៉ាងណាក៏ដោយស្ថានភាពទូទៅ នៅជុំវិញពិភពលោកបាននឹងកំពុង ដើរទៅរកតំណាក់កាលដ៏លំបាក។
គិតត្រឹមព្រឹកថ្ងៃទី៦ តុលា អ្នកឆ្លង COVID-19 នៅទូទាំងពិភពលោកកើនឡើងជិត៣៦លាននាក់ ក្នុងនោះស្លាប់ជាង១លាន៤ម៉ឺននាក់ និងជាសះស្បើយជិត២៧លាននាក់៕