លោក Boy Pakorn គឺជាតារាប្រុសថៃ ដែលធ្វើឲ្យមហាជនស្រឡាញ់ចូលចិត្តមិនត្រឹមការសម្ដែង និងភាពស្រស់សង្ហា តែគ្រប់គ្នាក៏ពេញចិត្តចរិតរួសរាយ ពូកែលេងសើចរបស់លោកដែរ។
ទោះបីចូលសិល្បៈតាំងពី ២០០៦មកមែន ប៉ុន្តែលោកនៅតែជាតារារះគ្រប់រដូវកាលប្រចាំពិភពសិល្បៈថៃ និងក៏ជាតារាដែលតែងមានទំនាក់ទំនងល្អជាមួយអ្នកជុំវិញខ្លួនដែរ តាមបែបសាមញ្ញៗ។
ក្នុងគ្រួសារលោក មានប្អូនប្រុសបង្កើត ២នាក់ និងប្អូនស្រីចិញ្ចឹមម្នាក់ ។ ឪពុករបស់លោកបានលាចាកលោក តាំងតែពី Boy នៅក្មេងម្ល៉េះ។
លោកបានបញ្ចប់ការសិក្សាថ្នាក់បរិញ្ញាបត្រជំនាញឱសថសាស្ត្រពីសាកលវិទ្យាល័យ Chulalongkorn ។ ការងារដំបូងរបស់លោក គឺជាឱសថការីដែលមានការទទួលស្គាល់ត្រឹមត្រូវ នៅក្នុងទីក្រុងបាងកក។
Boy បានឈានជើងចូលសិថីសិល្បៈដំបូង ដោយចាប់អាជីពជាតារាម៉ូដែលថតស្ប៉តពាណិជ្ជកម្ម ។ ក្រោយមក លោកក៏បានសម្ដែងក្នុងវីដេអូបទចម្រៀង រហូតដល់ថ្ងៃមួយមានឱកាសក្លាយជាតារាភាពយន្ត។
ភាពយន្តខ្នាតធំដំបូងដែលលោកថតមានចំណងជើងថា «4 Romance» ក្នុងឆ្នាំ ២០០៨ ។ រហូតដល់ឆ្នាំ ២០០៩ លោកក៏មានសំណាងធំបានសម្ដែងរឿងភាគ «Fai Rak Arsoon» ឲ្យប៉ុស្តិ៍លេខ៣ ។
ប្រជាប្រិយភាពរបស់លោកចាប់ផ្ដើមហក់ឡើងខ្លាំង ពេលលោកសម្ដែងរឿង «Wayupak Montra» ឆ្នាំ ២០១០ ជាមួយនឹង Margie Rasri។
