ក្នុងពេលបំពេញទស្សនកិច្ចនៅខេត្ត South Hwanghae ភាគនិរតីទីក្រុងព្យុងយ៉ាង ជាទីដែលព្យុះទីហ្វុង កំពុងបោកបក់ កាលពីថ្ងៃទី២៧ ខែសីហា ម្សិលមិញ លោក គីម ជុងអ៊ុន បានថ្លែងថា ឥទ្ឋិពលព្យុះទីហ្វុង Bavi បានត្រឹមបង្កផលប៉ះពាល់តិចតួចប៉ុណ្ណោះដល់ប្រទេសកូរ៉េខាងជើង។ នេះបើតាមសារព័ត៌មាន CNA ចេញផ្សាយនាព្រឹកថ្ងៃទី២៨ ខែសីហា ឆ្នាំ២០២០ នេះ។
យ៉ាងណាមិញ លោក គីម ជុងអ៊ុន ក៏បានកោតសរសើរដល់មន្ត្រីគណបក្សពលករកូរ៉េ ដែលបានចុះទៅជួយសង្គ្រោះទាន់ពេលវេលា។
សូមជម្រាបផងដែរថា ទូរទស្សន៍រដ្ឋកូរ៉េខាងជើង KCTV កាលពីដើមខែសីហា បានចេញផ្សាយខ្សែវីដេអូមួយ ស្តីពីស្ថានភាពគ្រោះទឹកជំនន់ នៅភាគខាងលិចប្រទេសកូរ៉េខាងជើង ដែលបានបង្កការខូចខាតធ្ងន់ធ្ងរ ដល់ផលដំណាំរបស់ប្រជាជន។ ជាមួយគ្នាអ្នកតាមដានស្ថានការណ៍កូរ៉េខាងជើង ក៏កំពុងមានការព្រួយបារម្ភពីគ្រោះអត់ឃ្លាន ដែលអាចនឹងកើតមានក្នុងប្រទេសដ៏ឯកោមួយនេះ៕