មន្ត្រីសាខា ក.ប.ប. ខេត្តកំពត-កែប កាលពីថ្ងៃទី២២ ខែសីហា ឆ្នាំ២០២០ បានចុះត្រួតពិនិត្យផលិតផលម្ហូបអាហារ នៅក្នុងផ្សារក្តាម ខេត្តកែប រកឃើញ និងរឹបអូសបង្គាមានផ្ទុកសារធាតុស្រដៀងចាហួយចំនួន ៣៩គីឡូក្រាម។
មន្ត្រី ក.ប.ប បានឲ្យដឹងថា ក្នុងសកម្មភាពត្រួតពិនិត្យ មន្ត្រីជំនាញបានធ្វើការវិភាគបឋមរកសារធាតុគីមីហាមឃាត់នៅលើបង្គា ចំនួន ២៣ តូប ជាលទ្ធផលមន្ត្រីជំនាញ បានរកឃើញបង្គាដែលមានផ្ទុកសារធាតុស្រដៀងចាហួយចំនួន ៣៩គីឡូក្រាម។ បន្ទាប់មកមន្ត្រីជំនាញបានធ្វើកំណត់ហេតុដកហូតបង្គាទាំងនោះ ដើម្បីយកទៅដុតកម្ទេចចោលភ្លាមៗ ក្នុងការដុតកម្ទេចនេះដែរ មានការចូលរួមពីឯកឧត្តមអភិបាលខេត្តកែប និងសម្របសម្រួលដោយលោកព្រះរាជាអាជ្ញាអមសាលាដំបូងខេត្តផងដែរ។
មន្ត្រីជំនាញក៏បានធ្វើការណែនាំដល់អាជីវករផ្សេងទៀត ឱ្យយល់ដឹង និងអនុវត្តទៅតាមច្បាប់ស្តីពីការគ្រប់គ្រងគុណភាព សុវត្ថិភាព លើផលិតផល ទំនិញ និងសេវា ព្រមទាំងច្បាប់ស្តីពីកិច្ចការពារអ្នកប្រើប្រាស់ ដើម្បីជៀសវាងបង្កផលប៉ះពាល់ដល់សុខភាពប្រជាពលរដ្ឋ នឹងអាចប្រឈមចំពោះមុខច្បាប់ថែមទៀត៕
