ស្របពេលដែលសហរដ្ឋអាមេរិក កំពុងប្រឈមមុខខ្លាំងជាមួយជំងឺកូវីដ១៩ រីឯអាជ្ញាធររដ្ឋកាលីហ្វ័រញ៉ា ឯណោះវិញ កំពុងជម្លៀសប្រជាជនជាង ៨,០០០នាក់ ចេញពីតំបន់កំពុងគំរាមកំហែងដោយភ្លើងឆេះព្រៃ ងាកមកកាន់រដ្ឋ North Carolina ប្រធានាធិបតីអាម៉េរិកលោក ដូណាល់ ត្រាំ ក៏បានប្រកាសដាក់ភាពអាសន្ន ខណៈដែលខ្យល់ព្យុះ អាយសៃអាស់ នឹងធ្វើដំណើរមកដល់ នាពេលឆាប់នេះ។
សារព័ត៌មានរ៉យទ័រនៅថ្ងៃទី០៣ ខែសីហា ឆ្នាំ២០២០ ម្សិលមិញ បានចុះផ្សាយថា អ្នកព្យាករណ៍អាកាសធាតុបានព្រមានពីភ្លៀងធ្លាក់ជោគជាំ និងខ្យល់បក់ខ្លាំងក្លាអាចនឹងកើតឡើង នៅពេលដែលខ្យល់ព្យុះត្រូពិច អាយសៃអាស់ ធ្វើដំណើរឆ្ពោះទៅកាន់តំបន់ឆ្នេរសមុទ្រភាគខាងកើតសហរដ្ឋអាម៉េរិក ដោយរំពឹងថានឹងមានភ្លៀងធ្លាក់ខ្លាំងក្លានៅយប់ថ្ងៃច័ន្ទនេះ (ម៉ោងក្នុងតំបន់) នៅតំបន់ចន្លោះព្រំប្រទល់រវាងរដ្ឋ North Carolina និងរដ្ឋ South Carolina។
សូមបញ្ជាក់ផងដែរថា ខ្យល់ព្យុះត្រូពិច អាយសៃអាស់ មានកម្លាំងខ្យល់ថេរក្នុងកម្រិតអតិបរមា១១០គីឡូម៉ែត្រក្នុងមួយម៉ោងនៅព្រឹកថ្ងៃច័ន្ទម្សិលមិញ (ម៉ោងក្នុងតំបន់) និងត្រូវគេរំពឹងថា នឹងនៅតែជាខ្យល់ព្យុះត្រូពិចដ៏ខ្លាំងក្លាដដែល នៅពេលដែលវាបង្អុរភ្លៀង៕
