ក្រុមហ៊ុនអាមេរិក Microsoft បាននឹងកំពុងចរចា សុំទិញកម្មវិធី TikTok ពីក្រុមហ៊ុន ByteDance របស់ចិន។ នេះបើយោងតាមការចេញផ្សាយរបស់សារព័ត៌មាន Reuters នៅថ្ងៃទី០៣ ខែសីហា ឆ្នាំ២០២០។
ក្រុមហ៊ុន Microsoft បានអះអាងថា ខ្លួនបានធ្វើបទបង្ហាញទៅកាន់ការិយាល័យលោកប្រធានាធិបតីរួចរាល់ហើយ អំពីការព្រួយបារម្ភពីសុវត្ថិភាព និងសន្តិសុខជាតិ ក្រោយពេលលោកប្រធានាធិបតីសហរដ្ឋអាមេរិក ដូណាល់ ត្រាំ ធ្លាប់បានប្រកាសថា លោក នឹងចុះហត្ថលេខាហាមឃាត់កម្មវិធី TikTok ក្នុងពេលឆាប់ៗខាងមុខនេះ។
គួរបញ្ជាក់ថា ទន្ទឹមនឹងការចរចារបស់ក្រុមហ៊ុន Microsoft ក៏មានក្រុមអ្នកវិនិយោគជាច្រើនហ៊ានបោះទុន ៥០ពាន់លានដុល្លារដើម្បីសុំទិញ TikTok ពីក្រុមហ៊ុនចិន ByteDance ដើម្បីផ្ដាច់ខ្លួន និងដើម្បីគេចផុតពីការដាក់សម្ពាធផ្សេងៗពីប្រទេសលោកខាងលិច៕
