ម៉ាក់ៗភាគច្រើនតែងបារម្ភខ្លាចលែងស្អាត បាក់សម្រស់ក្រោយសម្រាលកូនរួច ជាហេតុដែលធ្វើឲ្យព្យាយាមថែរក្សាសម្រស់តាមការនិយាយតៗគ្នា។ ជាក់ស្តែងមានការលើកឡើងមួយថា ញ៉ាំស្រាបៀរអាចធ្វើឲ្យសាច់ស្អាត ក្រោយពេលកូនចេញខែហើយ។
ចំពោះការលើកឡើងមួយនេះ លោកវេជ្ជបណ្ឌិត ចាន់ ស៊ីណេត ប្រធានផ្នែកសម្ភព និងរោគស្រ្តី នៃមន្ទីរពេទ្យមិត្តភាពកម្ពុជា-ចិន សែនសុខ បានឲ្យដឹងថា ពេទ្យដូចមិនសូវដែលឮ ហើយក៏គ្មានរូបមន្តនេះដែរ។ ការដែលមានសាច់ស្អាត និងសុខភាពល្អ គឺអាស្រ័យទៅលើការញ៉ាំបន្លែ ផ្លែឈើ និងអាហារបំប៉នបានគ្រប់គ្រាន់ប៉ុណ្ណេះទេ។ ចំណែកការផឹកស្រាបៀរ គឺមិនល្អចំពោះសុខភាពទេ ហើយក៏មិនអាចជួយឲ្យសាច់ស្អាតបានដែរ។
លោកវេជ្ជបណ្ឌិត បានបន្តថា ផ្ទុយទៅវិញ ការញ៉ាំស្រា ឬស្រាបៀរច្រើនធ្វើឲ្យប៉ះពាល់ដល់ ថ្លើម ក្រពះ តម្រងនោម នឹងអាចប្រឈម៖
– ខ្សោយខួរក្បាល
– ប៉ះពាល់ការចងចាំ
– វង្វេងវង្វាន់ស្មារតី
– មិនអាចបំបៅដោះកូនបាន។
ប្រសិនបើម៉ាក់ៗញ៉ាំស្រាហើយមកបំបៅដោះកូន អាចបណ្តាលឲ្យកូនប្រឈមនឹងបញ្ហាប៉ះពាល់ដល់សុខភាពដូចម្តាយដែរ។
ប្រភព៖ hellokrupet