មនុស្សស្រីទាំងអស់ពេលពពោះជួបបញ្ហាលំបាកអំឡុងពេលគេង ជាពិសេសពេលពោះកាន់តែធំ ដោយយប់ខ្លះមិនអាចគេងលក់ស្កប់ស្កល់ ត្រូវប្រែទៅប្រែមក។ កាលណាគេងមិនបានគ្រប់គ្រាន់សុខភាពយើង និងគភ៌ក៏មិនប្រសើរដែរ។ វេជ្ជបណ្ឌិត ចាន់ ស៊ីណេត បានឲ្យដំបូន្មានថា ដើម្បីងាយគេងលក់ស្កប់ស្កល់ និងការពារសុខភាពកូនក្នុងផ្ទៃ ម្តាយគ្រប់រូបគួរគេង ២ បែបដូចខាងក្រោម៖
១- គេងមានកល់ខ្នើយ
បើយើងពិបាកក្នុងការគេងណាស់ អាចយកខ្នើយមកកល់ដាក់ក្រោមជើង ដើម្បីសម្រួលការលំបាកចុករួយជើង ចុករួយចង្កេះ និងជួយឲ្យចលនាឈាមរត់ស្រួល ឬមិនហើមជើង។ យើងក៏អាចបន្ថែមខ្នើយទៅកល់ពីក្រោយខ្នង ដើម្បីកាត់បន្ថយអាការៈឈឺ ឬជាប់ចង្កេះ។
២- គេងផ្អៀងចំហៀង
គេងផ្អៀងទៅចំហៀងជាជម្រើសល្អបំផុត ជាពិសេសគឺការគេងផ្អៀងទៅឆ្វេង។ គេងផ្អៀងទៅឆ្វេងអាចជួយពង្រឹងរបត់ឈាមរត់ បង្កើនលំហូរឈាមបានកាន់តែច្រើនដល់គភ៌ បេះដូង និងតម្រងនោម។ មិនតែប៉ុណ្ណោះ វាក៏ជួយការពារ អាការៈក្រហាយដើមទ្រូង និងអាការៈឈឺខ្នង ឈឺចង្កេះបាន ព្រមទាំងជួយសម្រួលលំហូរឈាមទៅក្នុងស្បូន និងបង្កើនសារធាតុចិញ្ចឹម ដល់សុក ដែលនាំឲ្យទារកកាន់តែមានសុខភាពល្អ។
ប្រភព៖ hellokrupet
