ប្រជាពលរដ្ឋដែលត្រូវបានជម្លៀសឲ្យទៅស្នាក់នៅក្រោមស្ពានស្ទឹងមានជ័យ ជាបណ្ដោះអាសន្ន នឹងទទួលបានដីកម្មសិទ្ឋស្របច្បាប់ស្របតាមប្រឡាយស្ទឹងមានជ័យ នាចុងខែកក្កដា ឆ្នាំ២០២០ ខាងមុខនេះ។
នេះបើតាមការបញ្ជាក់ដោយឯកឧត្តម ឃួង ស្រេង អភិបាលរាជធានីភ្នំពេញ ក្នុងអង្គសិក្ខាសាលាស្ដីពី ការផ្សព្វផ្សាយរបាយការណ៍ នៃការសិក្សាទិន្នន័យមូលដ្ឋាន នៃសហគមន៍នៅតាមប្រឡាយ ស្ទឹងមានជ័យ និងការរៀបចំយុទ្ធសាស្ត្រស្វែងរកការគាំទ្រមតិលើវិស័យ រៀបចំផែនការនគររូបបនីយកម្ម និងការគ្រប់គ្រងដីធ្លី នាព្រឹកថ្ងៃទី១៣ ខែកក្កដា ឆ្នាំ២០២០នេះ។
ឯកឧត្តម ឃួង ស្រេង បានលើកឡើង រដ្ឋបាលរាជធានីភ្នំពេញ បានធ្វើការអភិវឌ្ឍន៍ សហគមន៍ ស្ទឹងមានជ័យ នៅនឹងកន្លែងដោយប្រជាពលរដ្ឋទទួលបានដីស្របច្បាប់នៅអម ប្រឡាយស្ទឹងមានជ័យនេះតែម្តង ហើយប្រឡាយស្ទឹងជ័យ ត្រូវបានស្ថាបនាឡើងដោយបុកស៊ីផាយជញ្ជាំងប្រឡាយ ជាមួយនឹងការកសាងផ្លូវ អមសងខាងប្រឡាយនេះផងដែរ។
ឯកឧត្តមបន្ថែមថា បើគិតមកដល់ពេលនេះ ការដ្ឋានស្ថាបនាប្រឡាយស្ទឹងមានជ័យ បានជិតឈានដល់ទីបញ្ចប់ហើយ ពោលគឺនៅក្នុងបំណាច់ខែកក្កដា ឆ្នាំ២០២០នេះ ប្រជាពលរដ្ឋដែលត្រូវបានជម្លៀស ឲ្យទៅស្នាក់នៅក្រោមស្ពានស្ទឹងមានជ័យ ជាបណ្ដោះអាសន្ននោះ រដ្ឋបាលរាជធានីភ្នំពេញ នឹងឲ្យពួកគាត់មករស់នៅ លើដីកម្មសិទ្ធិស្របច្បាប់របស់ពួកគាត់ ដែលសម្ដេចតេជោនាយករដ្ឋមន្ត្រី បានប្រទានកម្មឲ្យពួកគាត់នៅដីមួយឡូត៍ម្នាក់ នៅតាមបណ្ដោយប្រឡាយស្ទឹងមានជ័យនេះ៕