យើងដឹងហើយថាទារកដែលទើបនឹងកើតប្រព័ន្ធសារពាង្គកាយទាំងអស់នៅខ្សោយ ដូច្នេះតម្រូវឲ្យឪពុកម្តាយគ្រប់រូបត្រូវយកចិត្តទុកដាក់ថែទាំឲ្យបានដិតដល់ នោះការលូតលាស់របស់ទារកបានល្អ និងមិនសូវមានបញ្ហាចំពោះសុខភាព។
ដូច្នេះហើយរឿងមួយចំនួន ដែលឪពុកម្តាយមមិនត្រូវធ្វើដាក់កូនតូចនោះទេ ព្រោះអាចនឹងប៉ះពាល់ដល់សុខភាព និងរាងកាយទារក៖
១- ហាមឲ្យកូនគេងផ្ងារ
បន្ទាប់ពីកើតភ្លាម គ្រូពេទ្យបានណែនាំឲ្យម៉ាក់ៗដាក់កូនគេងផ្អៀងទៅឆ្វេង ឬខាងស្តាំ មិនឲ្យអូនតូច គេងផ្ងារនោះទេ។ ការឲ្យកូនគេងផ្អៀង ដើម្បីទម្លាក់ទឹកព្រៃដែលនៅសេសសល់តាមច្រមុះ ឬមាត់ឲ្យអស់ មិនឲ្យឈ្លក់ និងចូល សួត។
២- ហាមឲ្យកូនញ៉ាំទឹក
កូនកើតមកភ្លាម រហូតដល់អាយុ ៦ខែ យើងមិនត្រូវឲ្យកូនញ៉ាំទឹកនោះទេ។ ម៉ាក់ៗត្រូវឲ្យកូនម៉ឹមតែ ទឹកដោះមួយមុខគត់ គ្រប់គ្រាន់ហើយ ព្រោះទឹកដោះម៉ាក់ៗសម្បូរជាតិទឹក។
៣- ហាមបន្តក់ទឹកដោះលើភ្នែកកូន
ម៉ាក់ៗដែលកើតកូនតាមធម្មជាតិ អាអូនមានបញ្ហាភ្នែកច្រើនជាងសម្រាលដោយវះកាត់ តែទោះយ៉ាងណា យើងមិនត្រូវបន្តក់ទឹកដោះលើភ្នែកកូននោះទេ ព្រោះរឹតតែធ្វើឲ្យភ្នែកស្អិត ហើម និងរលាកភ្នែក។ ភ្នែកកូនតូចឈឺ គ្រូពេទ្យបានណែនាំឲ្យបន្តក់សេរ៉ូមប្រៃ។
៤- ហាមរោយម្សៅលើផ្ចិតកូន
ក្រោយចេញពីពេទ្យ ម៉ាក់ប៉ាត្រូវថែទាំផ្ចិតកូនឲ្យបានល្អ ដើម្បីបង្ការការឆ្លងរោគ ដោយធ្វើអនាម័យ និងលាងសម្អាតផ្ចិតកូនជាមួយអាល់កុល និងថ្នាំមេតាឌីន មិនត្រូវយកដីដំបូក សំបុកពីពាង-ឆ្កែញ៉ាំង ផេះ ម្សៅហុយមកបិទ ឬរោយពីលើផ្ចិតនោះទេ។ ផ្ចិតកូនក្មេងនឹងក្រៀមជ្រុះដោយឯកឯងក្នុងអំឡុង ៥-១៥ ថ្ងៃក្រោយសម្រាល។
៥- ហាមលាបប្រេងកូឡាលើបង្ហើយកូន
ចាស់ៗតែងលាបប្រេងកូឡានៅបង្ហើយកូនង៉ែត ដើម្បីឲ្យបង្ហើយឆាប់រឹង មិនផើតផត។ ជំនឿបែបនេះមិនត្រឹមត្រូវឡើយ ហើយថែមទាំងបង្កផលប៉ះពាល់ដល់ខួរក្បាលកូន និងមានអាចម៍ក្របីលើក្បាល។
៦- ហាមឲ្យកូនគេងតែមួយទម្រង់
កូនទើបនឹងកើតឆ្អឹងលលាដ៍ក្បាលនៅខ្ចីខ្លាំងណាស់ ដូច្នេះយើងមិនត្រូវឲ្យកូនគេងផ្អៀង ឬផ្ងារ រហូតទេ ត្រូវផ្លាស់ប្តូរទម្រង់នៃការគេង ម្តងឲ្យកូនគេងផ្អៀងទៅស្តាំ ម្តងគេងទៅស្តាំ ឬផ្ងារ។ ធ្វើបែបទើបទម្រង់ក្បាលកូនល្អ មិនសំប៉ែត។
ប្រភព៖ hellokrupet កែសម្រួលដោយ ៖ Hour
