រដ្ឋបាលរាជធានីភ្នំពេញ កាលពីព្រឹកថ្ងៃទី០៧ ខែកក្កដា ឆ្នាំ២០២០ បានចេញសេចក្តីជូនដំណឹងអនុញ្ញាតឲ្យក្លឹបកម្សាន្ត និង KTV ក្នុងមូលដ្ឋានរាជធានី បើកដំណើរឡើងវិញ ប៉ុន្តែស្ថិតក្នុងរូបភាពជាភោជនីយដ្ឋាន។
សេចក្តីជូនដំណឹង បានបញ្ជាក់ថា ដើម្បីចូលរួមសកម្មភាពសេដ្ឋកិច្ច និងផ្តល់ការងារឡើងវិញ រដ្ឋបាលរាជធានីភ្នំពេញអនុញ្ញាតអោយម្ចាស់អាជីវកម្ម ក្លឹបកម្សាន្ត និងខារ៉ាអូខេទាំងអស់ នៅរាជធានីភ្នំពេញ បើកដំណើរការដោយប្រែក្លាយទៅជាភោជនីយដ្ឋាន ប៉ុន្តែម្ចាស់អាជីវកម្មត្រូវស្នើសុំលិខិតអនុញ្ញាតអាជីវកម្មតាមយន្តការច្រកចេញចូលតែមួយ រាជធានីភ្នំពេញ និងគោរពឲ្យបានម៉ឺងម៉ាត់នូវវិធានរបស់ក្រសួងសុខាភិបាល ក្នុងការទប់ស្កាត់នូវការរីករាលដាលនៃជំងឺកូវីដ១៩ និងវិធានសុវត្ថិភាពរបស់ក្រសួងទេសចរណ៍៕
