ខេត្តបាត់ដំបង៖ នៅព្រឹកថ្ងៃទី២៩ ខែមិថុនា ឆ្នាំ២០២០នេះ ឯកឧត្តម ងួន រតនៈ អភិបាលខេត្តបាត់ដំបង បានអញ្ជើញជាអធិបតីក្នុងពិធីប្រកាសចូលកាន់មុខតំណែងអភិបាលស្តីទីស្រុកគាស់ក្រឡថ្មី ជំនួសលោកអភិបាលស្រុកចាស់ដែលទើបបញ្ចប់មុខតំណែង។
ក្នុងពិធីប្រកាសចូលកាន់មុខតំណែងនាថ្ងៃនេះ ឯកឧត្តម ងួន រតនៈ បានមានប្រសាសន៍ផ្តាំផ្ញើដល់លោក អភិបាលស្រុកថ្មី ធ្វើយ៉ាងណាត្រូវមានសាមគ្គីភាពផ្ទៃក្នុងឱ្យកាន់តែទូលំទូលាយថែមទៀត រវាងថ្នាក់លើ និងថ្នាក់ក្រោម ជាមួយបណ្តាមន្ទីរ អង្គភាព ដៃគូរអភិវឌ្ឍពាក់ព័ន្ធនានា និងរដ្ឋបាលឃុំ ព្រមទាំងសមត្ថកិច្ចពាក់ព័ន្ធ។
បន្ថែមពីនេះត្រូវបន្តយកចិត្តទុកដាក់ដោះស្រាយបញ្ហាកង្វល់ សំណូមពរនានារបស់ប្រជាពលរដ្ឋ ជាពិសេសករណីទំនាស់ដីធ្លី ដោយស្មារតីយកចិត្តទុកដាក់គិតគូរដល់ផលប្រយោជន៍របស់ប្រជាពលរដ្ឋជាធំដោយមិនត្រូវទុកឱ្យប្រជាពលរដ្ឋរងគ្រោះដោយសារបញ្ហាទំនាស់ដីធ្លីនោះទេ។
គួរបញ្ជាក់ថា លោក ញឹក សារ៉ែន អតីតប្រធានផ្នែកច្បាប់ និងស៊ើបអង្កេត សាលាខេត្ត ត្រូវបានតែងតាំងជាអភិបាលស្តីទី នៃគណៈអភិបាលស្រុកគាស់ក្រឡ ជំនួសលោក ម៉ៅ សុចាន់ ដែលទើបបញ្ចប់មុខតំណែង អោយទៅបម្រើការងារនៅសាលាខេត្តវិញ៕
