អគ្គនាយកដ្ឋានពន្ធនាគារនៃក្រសួងមហាផ្ទៃ បានសម្រេចរំកិលផែនការនៃការពង្រីកហេដ្ឋារចនាសម្ព័ន្ធពន្ធនាគារទៅឆ្នាំក្រោយ ដោយសារតែផលប៉ះពាល់ពីជំងឺកូវីដ ១៩។ នេះបើតាមការបញ្ជាក់ពីឯកឧត្តម សន្តិបណ្ឌិត ចាន់ គឹមសេង អគ្គនាយកនៃអគ្គនាយកដ្ឋានពន្ធនាគារ។
ឯកឧត្តម បានថ្លែងថា ផែនការសកម្មភាពសម្រាប់អនុវត្ដការកសាងហេដ្ឋារចនាសម្ព័ន្ធក្នុងពន្ធនាគារ ឆ្នាំ២០២០ គឺអគ្គនាយកដ្ឋានពន្ធនាគារបានលើកគម្រោងរួចរាល់អស់ហើយ។ ប៉ុន្ដែព្រោះបញ្ហាការរីករាលដាលជំងឺកូវីដ ១៩ ដែលបង្កផលប៉ះពាល់ដល់សេដ្ឋកិច្ច និងដល់ថវិកាដូច្នេះគម្រោងនេះនឹងរំកិលទៅឆ្នាំខាងមុខទៀត។
ឯកឧត្តមបន្តថា ឆ្នាំនេះ យើងខិតខំឱ្យហើយចំពោះការសាងសង់ថ្មីពន្ធនាគារខេត្ដកំពង់ចាម ព្រោះពន្ធនាគារនេះយើងសាងសង់ជិតរួចរាល់ហើយ។ ការសាងសង់ពន្ធនាគារថ្មីនៅខេត្ដកំពង់ចាមនេះ ព្រោះថាពន្ធនាគារចាស់របស់ខេត្ដកំពង់ចាមស្ថិតនៅក្នុងទឹកដីខេត្ដត្បូងឃ្មុំដែលបានកាត់ចេញពីខេត្តកំពង់ចាម។ ក្រៅពីគម្រោងខេត្ដកំពង់ចាមគម្រោងសាងសង់នេះគឺត្រូវរំកិលទៅឆ្នាំបន្ទាប់៕