ក្រសួងការបរទេសចិន បានច្រានចោលព័ត៌មាន ដែលបានលើកឡើងថា មានទាហានចិនចំនួន ៤០នាក់ បានស្លាប់ក្នុងពេលប៉ះទង្គិចជាមួយឥណ្ឌា នៅតំបន់ព្រំដែន។
បើតាមសារព័ត៌មានRT បានចុះផ្សាយថា លោក Zhao Lijian ជាអ្នកនាំពាក្យក្រសួងការបរទេសចិន បានថ្លែងក្នុងសន្និសីទកាសែតមួយ ដោយបដិសេធអំពីព័ត៌មានមិនផ្លូវការដែលបានចុះផ្សាយថា មានទាហានចិនចំនួន៤០នាក់បានស្លាប់ក្នុងពេលប៉ះទង្គិចនៅតំបន់ព្រំដែនជាមួយកងទ័ពឥណ្ឌា។
លោកថា ក្នុងពេលនេះ ចិន និងឥណ្ឌា កំពុងព្យាយាមចរចារទៅរកដំណោះស្រាយ ដើម្បីបន្ឋូរបន្ថយភាពតានតឹង រវាងប្រទេសទាំង២។
គួររំលឹកថា កាលពីដើមសប្ដាហ៍មុន ទាហានចិន និងឥណ្ឌាបានប៉ះទង្គិចគ្នានៅតំបន់ព្រំដែន។ ក្រោយមក ឥណ្ឌាបានបង្ហាញតួលេខផ្លូវការថា ទាហានខ្លួនបានស្លាប់ចំនួន២០នាក់ ហើយក៏មានប្រព័ន្ឋផ្សព្វផ្សាយមួយចំនួន ចុះផ្សាយផងដែរថា មានទាហានចិនយ៉ាងហោចណាស់ ៤០ នាក់បានស្លាប់ នៅក្នុងពេលប៉ះទង្គិចនោះ៕
